依加啲美容院為咗賺錢真係乜都敢推 連屍皮針都賣
-
最近睇新聞見到衞生署喺尖沙咀同旺角做嘢，掃走咗一款叫 「Elravie Re2O」 的未註冊針劑，俗稱叫 「屍皮針」……
源頭真係人體皮膚：
唔係平時嗰啲玻尿酸或者聚左乳酸（PLLA），而係喺其他人捐贈嘅皮膚度提取出嚟嘅「細胞外基質」（Extracellular Matrix）。諗下打入去嘅嘢係源自其他人嘅皮膚，真係越諗越毛骨悚然……「以物補物」真係講得出口？根本冇 FDA 認可，美容效用零明確數據：
醫生話，喺韓國呢隻嘢只係被列為「人體組織製品」，監管標準好鬆，根本唔係正規醫療器材。打落去個效果好唔好暫時冇數據，純粹係灰色地帶。隨時幫人「接代」帶病毒基因：
最可怕係安全性問題！如果捐捐贈者本身有病毒、不良基因或者病，而提煉消毒嗰陣做唔足，你一打落去就等於直接接收人哋啲病毒。得不償失：
醫生講得好中肯：平時救命輸血都話要冒極微風險，救命冇辦法啦；但你純粹為咗美容，冒咁大風險拿他人嘅皮膚物質打入自己塊面度，萬一中招真係毀容兼得不償失！到底要幾勇先敢喺自己塊面打呢啲未註冊嘅屍皮針？
大家身邊有冇朋友聽過或者差啲被美容院sell咗？大家點睇？
-
屍皮針呢個名聽落已經好邪，到底係邊個天才諗出嚟....
-
啲黑心美容院真係好誇張，總之有新嘢、利潤高就夾硬推給客人，完全唔理安全性。打盲或者感染病毒嗰陣，佢哋咪又係清盤破產閃人
-
正規醫美有FDA認可嘅保濕針、童顏針唔打，偏偏要去打呢啲韓國灰色地帶嘅未註冊針？根本係拿自己塊面嚟做白老鼠
-
韓國被列為人體組織製品？韓國人都未必敢打啦！會唔會係韓國嗰邊驗完覺得有問題銷唔到貨，所以運嚟香港當神針賣給港女？
