老實講，見到呢單新聞，第一個感覺係「吓，又嚟？」

其實呢啲「美容院用假機」嘅傳聞，坊間講咗好多年。成日聽啲朋友講，做完幾千蚊一次嘅「某某射頻」、「某某超聲刀」，完全冇效果，甚至試過做完塊面又紅又腫，原來可能根本係淘寶幾百蚊嘅冒牌貨。收你就旗艦店價，服務就係山寨級數，真係當啲客係水魚。

今次海關叫做做咗嘢，檢獲嗰三部懷疑冒牌儀器，估計市價十八萬，如果係堅嘢嘅隨時貴幾倍甚至過百萬。美容院用呢啲假機，成本低到笑，但收客就收足正宗價錢，根本係違反《商品說明條例》，呃得就呃。

最離譜嘅係，呢類冒牌儀器冇安全認證，輸出能量唔穩定，輕則冇效果，重則灼傷皮膚、起水泡，甚至留疤。你諗吓，你俾錢諗住變靚，結果係毁容，真係喊都無謂。

所以話，各位姐妹幫襯美容院，真係要打醒十二分精神：
揀有信譽、開咗一段時間嘅大店
做療程前，問清楚用緊邊個牌子嘅儀器，上網對吓個樣
甚至叫佢哋出示正貨證明或者向代理查詢
見到價錢平得離譜，例如出面做一次三千，佢收三百，九成九有伏

最後都要讚下海關今次嘅行動，雖然拉得三間可能只係冰山一角，但至少有阻嚇作用。希望佢哋繼續嚴查，尤其係啲樓上舖、啲IG Facebook賣廣告賣到行晒嘅神秘美容院。大家如果發現有可疑，記得打去海關舉報，唔好怕麻煩。

記住，貪平貪方便，隨時輸得甘過你買股票。自己塊面，自己把關。